Num 12 | ZomZIV | STEP | Moses in Cush-te khat a zi dingin la-a, ama Cush zi hangin Miriam le Aaron in Moses a langgen uh hi.

Numbers 12

Miriam le Aaron in Moses Langneih

1 Moses in Cush-te khat a zi dingin la-a, ama Cush zi hangin Miriam le Aaron in Moses a langgen uh hi. 2 Amaute in, “Moses bek tungtawnin TOPA in thu gen ahi hiam? Eite tungtawnin zong gen hi lo ahi hiam?” a ci uh hi. Hih pen TOPA in a za hi. ^a

3 (Moses a lungnem mahmah mi khat hi a, leitungah om mi khempeuh sangin a lungnem zaw hi).

4 TOPA in Moses, Aaron le Miriam-te tungah, “No teng thum na vekun hong paikhia-in Kikhopna Puanbuk ah hong pai un,” ci-in thakhatin a sam hi. Tua ciangin tua teng thum a paikhia uh hi. 5 Tua ciangin TOPA, meikhuampi in a kiasuk hi; amah Puanbuk lutna-ah dinga Aaron le Miriam a sam hi. Amaute gel mailam ah a kalsuan uh ciangin 6 amah in, “Ka thugen ngai un:

“Note lakah TOPA kamsang a om ciangin,
ama tungah mangmuhna tawh ka kilak a, ^b
mang sungah amah ka hopih hi.
7 Ahi hangin ka nasem Moses tua bang ahi kei hi; ^c
amah ka inn sung khempeuh ah a muanhuai hi. ^d
8 Amah tawh maitang kituahin ka hopih hi;
khiat lai ding hi loin a kitel sinsen hi;
amah in TOPA pianzia a mu hi.
Tua ahileh bang hangin ka nasempa Moses
langgen ding lau lo na hi uh hiam?” a ci hi.

9 Amaute tungah TOPA hehna kuanga amaute a nusia hi.

10 Puanbuk tungsan panin meii a kilakkhiat toh ciangin tua lai-ah Miriam dinga - phakin e vuk a bang hi. Tuanu lamah Aaron kihei-a amah a phak lam a mu hi; 11 Amah in Moses kiangah, “Ka topa aw, nong hehpihna-in haitat-a ka bawl uh mawhna hangin kote hong mawhsak kei in. 12 Amah a nu sul sung pana suakkhia alang kine beisa naungek bangin hisak kei in,” a ci hi. ^e

13 Tua ciangin Moses in TOPA kiangah, “Pasian aw, nong hehpihna-in tuanu damsak in,” ci-in a kiko hi.

14 TOPA in Moses kiangah, “Tua numei a pa in a maitang a cil phih leh ni sagih sung a mai zum ding hi lo ahi hiam? Tuanu ni sagih sung giahphual pualamah tuam koih in; tua khit ciangin amah kipaipih kik thei ding hi,” ci-in a dawng hi. 15 Tua ciangin giahphual pua-ah ni sagih sung Miriam kituam koiha, amah a kipaipih kik mateng meiipi a kikhin nai kei hi. ^f

16 Tua khit ciangin mite in Hezeroth nusia-in Paran Sehnel-gam ah giahphual a sat uh hi. ^g